G-Dragon олон жил хамт ажилласан багийн гишүүддээ тансаг орон сууц бэлэглэжээ
Өмнөд Солонгосын алдарт дуучин, BigBang хамтлагийн ахлагч G-Dragon олон жил хамтран ажилласан менежерүүд болон гол ажилтнууддаа хэдэн зуун сая воны үнэ бүхий тансаг орон сууц бэлэглэсэн гэх мэдээлэл цахим орчинд олны анхаарлыг татаж байна.
Super Admin·2026.08.26 10:55:22·19 үзсэн
38 настай уран бүтээлч уг бэлгээ дөрөвдүгээр сарын сүүлээр өөрийн “Team GD” багийн зарим менежер, гол ажилтнуудад өгсөн гэж 8Days мэдээлжээ. Тэдний хэн болохыг албан ёсоор зарлаагүй ч G-Dragon-той анхны уран бүтээлийн жилүүдээс нь буюу бараг 20 жилийн турш хамт ажилласан хүмүүс гэж мэдээлсэн байна.
G-Dragon өмнө нь ажилтнуудынхаа талаар ярихдаа “Миний хэрэгцээ хоёрдугаарт, миний хүмүүсийн гэр орон нэгдүгээрт” хэмээн хэлж байсан гэх мэдээлэл бий.
Түүнчлэн Хятадын 163.com порталын мэдээлснээр G-Dragon 2025 онд өөрийн харьяалагддаг Galaxy Corporation-оос 65 тэрбум воноос дээш буюу ойролцоогоор 44 сая ам.долларын орлого олжээ. Мөн Сөүл хотод 8.8 тэрбум воны үнэлгээтэй барилга эзэмшдэг бөгөөд түүний үл хөдлөх хөрөнгийн нийт үнэ цэнэ 56 тэрбум вон орчимд хүрдэг гэж мэдээлсэн байна.
G-Dragon ажилтнууддаа өндөр үнэтэй бэлэг өгдөгөөрөө өмнө нь ч олны анхаарлыг татаж байсан түүхтэй нэгэн.
Түүний ажилтнууд салбарын дунджаас хоёр дахин өндөр цалин авдаг гэх мэдээлэл байдаг бөгөөд алт, алмааз, бугуйн цаг зэрэг үнэтэй бэлэг авч байсан тухай мэдээллүүд гарч байсан юм.
Мөн эмэгтэй ажилтнууд нь жирэмсэн болсон тохиолдолд алтан эдлэл бэлэглэдэг, дэлхийн аялан тоглолтынхоо үеэр бүжигчин бүрт 1.65 сая воны үнэтэй зүүлт өгсөн гэх мэдээлэл ч бий.
Жинхэнэ нэр нь Квон Жи Ён (Kwon Ji-yong) бөгөөд G-Dragon нь BigBang хамтлагийн ахлагчийн хувиар дэлхийд танигдсан. Тус хамтлаг нь дэлхийн хамгийн амжилттай эрэгтэй хамтлагуудын нэг болсон бөгөөд тэрээр 2009 онд бие даасан уран бүтээлийн карьераа эхлүүлсэн юм.